2025 жылғы 29 мамырда ISSAI-дың IT өнім менеджері Әмина Байкенова Мақсұт Нәрікбаев университетінде өткен Гуманитарлық ғылымдар мектебінің VI жыл сайынғы Бизнес кеңесінде спикер ретінде қатысты.
Іс-шара университет пен жетекші жұмыс берушілер — қазіргі және болашақ серіктестер арасындағы диалог алаңы ретінде маңызды рөл атқарды. Талқылаулар қолданбалы лингвистика, аударма ісі, туризм, қонақүй ісі және психология салаларындағы академиялық бағдарламаларды жаңғырту мәселелеріне арналды.
Өзінің таныстырылымында Әмина ISSAI-дың жасанды интеллектке негізделген жетекші өнімдері — MangiSoz және Oylan2 жобаларын таныстырып, бұл технологияларды білім беру бағдарламаларына қалай біріктіруге болатынын айтты. Ол жасанды интеллект құралдарының оқу үдерісін жетілдіруге, тілдік дағдыларды дамытуға, сыни ойлауды күшейтуге және әрбір студенттің қажеттіліктеріне сай дараланған оқу жолын құруға мүмкіндік беретінін атап өтті.
«Білім берудің болашағы — дараланған, икемді және технологияға негізделген тәсілдерде. ISSAI командасы ретінде біз жасанды интеллектті біріктіру — жай ғана тренд емес, бұл — білім сапасын арттыру мен заманауи оқытуды қамтамасыз етудің қажетті шарты деп санаймыз», — деді Әмина Байкенова.
Әминаның таныстырылымы академиялық және индустриялық өкілдер тарапынан үлкен қызығушылық тудырды. Бұл жасанды интеллектке негізделген шешімдердің білім беру саласында өзектілігі артып келе жатқанын дәлелдейді. ISSAI-дың мұндай іс-шараларға қатысуы — IT саласы мен білім беру жүйесі арасындағы тұрақты серіктестіктерді дамытуға деген ұмтылысын көрсетеді.