Ақылды жүйелер мен жасанды интеллект институтының (ISSAI) атқарушы директоры Ербол Абсалямов «Qazaqstan» телеарнасындағы «Ашық алаң» ұлттық бағдарламасының тікелей эфиріне қатысты. «Жасанды интеллект дәуіріндегі Қазақстан» деп аталған шығарылымда еліміздің цифрлық болашағын жасанды интеллект арқылы дамыту жөніндегі батыл жоспарлары талқыланды.
Бағдарламаға сондай-ақ саланың жетекші мамандары қатысты: Жасанды интеллект және инновациялық даму комитеті төрағасының орынбасары Әлібек Сайланбаев, Astana Hub бас директорының кеңесшісі, IT-маман Дәнабек Қалияждаров, Қазақстан Республикасы Сенатының депутаты Әлішер Сатыбалдыев және Л.Н. Гумилев атындағы Еуразия ұлттық университетінің Физика-техникалық факультетінің радиоэлектроника, электроника және телекоммуникациялар кафедрасының доценті Бекболат Медетов.
Панельдік талқылауда Қазақстанның ИИ стратегиясына байланысты маңызды тақырыптар қозғалды: өңірдегі алғашқы 2 экзафлопс қуаттылығындағы суперкомпьютердің іске қосылуы, ұлттық қазақ тіліндегі ірі тілдік модель – KazLLM-нің жасалуы және 2025 жылы ашылатын халықаралық Alem.ai жасанды интеллект орталығы.
Талқылау барысында Ербол Абсалямов ISSAI-дың миссиясын таныстырып, қазақ, орыс, ағылшын және түрік тілдерін түсінетін алғашқы ірі тілдік модель – KazLLM жасауға институттың қосқан үлесі туралы айтып берді. 150 миллиард токенге негізделіп үйретілген бұл модель Орталық Азиядағы көптілді жасанды интеллект үшін негіз болып табылады және жергілікті тілдік технологиялардың қолжетімділігі мен инклюзивтілігін қамтамасыз етуде маңызды рөл атқарады.
Сондай-ақ Ербол ISSAI суперкомпьютерлерді зерттеу мақсатында (модельдерді үйрету үшін), әсіресе KazLLM жобасында қалай қолданатынын, Қазақстанда суперкомпьютерлік кластер құрудың негізгі мақсаты мен оның пайдасын түсіндіріп өтті.
Панельде қоғам үшін маңызды мәселелер де талқыланды: жасанды интеллекттің цифрлық теңдікке әсері, ауылдық аймақтарда заманауи технологиялардың қолжетімділігі, сондай-ақ генеративті ИИ құралдарының мемлекеттік және жекеменшік секторлар мен қарапайым қолданушылар үшін беретін мүмкіндіктері.
ISSAI осындай өзекті әрі маңызды тақырыптардың қоғам талқысына шығуына әрдайым қолдау көрсетіп келеді және инклюзивті, этикалық әрі баршаға пайдалы заманауи технологияларды дамытуға бағытталған цифрлық экожүйе қалыптастыруға белсенді атсалысуда.
Толық видеоны Qazaqstan TV-ның YouTube арнасынан көре аласыз.