Жақында Назарбаев Университетінде Университет Президенті, профессор Вакар Ахмадтың жетекшілігімен Townhall форматындағы кездесу өтті. Іс-шараға NU-дың түрлі бөлімшелерінің өкілдері қатысты. Олардың қатарында Ғылыми зерттеулерді басқару департаменті (NURA), Ақылды жүйелер мен жасанды интеллект институты (ISSAI), Әлеуметтік даму қоры (SDF), Университеттік сервистерді басқару (USM), Ақпараттық технологиялар департаменті (NUITS) және Ұлттық зертхана Астана (NLA) болды.
Өз сөзінде профессор Ахмад ISSAI-дің ерекше жетістіктерін атап өтіп, Институттың Қазақстанның ірі тілдік моделі KazLLM, ұлттық контекске бейімделген бейне генерациялау моделі Beynele, аудио, тіл және көруді біріктіретін мультимодальды генеративті ИИ Oylan, сондай-ақ заманауи инференс сервері Mangitas бойынша жүргізіп жатқан алдыңғы қатарлы жұмыстарын ерекше бағалады. Сондай-ақ ол бұған дейін Ғылым және жоғары білім министрі Саясат Нұрбектің KazLLM-ның Қазақстанның жасанды интеллект экожүйесін дамытудағы стратегиялық маңызын атап өткенін еске салды.
Профессор Ахмад ISSAI-дің үлесі тек Назарбаев Университеті үшін ғана емес, сонымен бірге Қазақстанды жасанды интеллект саласындағы зерттеу мен инновациялар бойынша өңірлік көшбасшы ретінде әлемдік аренаға шығаруда маңызды рөл атқаратынын айтты.
Кездесу аясында Университетке он жылдан астам уақытын арнаған қызметкерлерді марапаттау рәсімі өтті. ISSAI кадрлар жөніндегі менеджері Дана Маханова өз марапатын профессор Вакар Ахмадтың қолынан алды. Бұл марапат Университеттің ұзақ мерзімді адалдық пен жоғары кәсібилікті бағалауының белгісі болды.
Біз осы шабыттандыратын кездесуді ұйымдастырғаны үшін Назарбаев Университетіне шынайы алғысымызды білдіреміз. Бұл шара бізге қол жеткізген нәтижелерімізді саралап, Қазақстандағы жасанды интеллект зерттеулері мен инновацияларының болашағын қалыптастыруда жаңа биіктерге ұмтылуға жігер берді.