2025 жылғы 17–19 қыркүйек аралығында Ақылды жүйелер және жасанды интеллект институты (ISSAI) Алматы қаласындағы Sadu Arena кешенінде өткен Орталық Азиядағы ең ірі киберқауіпсіздік конференциясы — KazHackStan 2025 іс-шарасына қатысты. Іс-шараға халықаралық сарапшыларды, мемлекеттік орган өкілдерін, бизнес көшбасшыларын және киберқауіпсіздік мамандарын қоса алғанда 6 000-нан астам қатысушы жиналды.
ISSAI-дің өнімдер және сыртқы байланыстар жөніндегі директордың міндетін атқарушысы Амина Байкенова спикер ретінде қатысып, конференцияның үш күні бойы тақырыптық сессияларға белсенді араласты. Өз презентациясында ол Mangitas шешімін таныстырды — бұл Қазақстандағы деректер егемендігіне, киберқауіпсіздік талаптарына сәйкестікке және егемен ЖИ инфрақұрылымына деген өсіп келе жатқан сұранысты қанағаттандыруға арналған ISSAI-дің қорғалған жергілікті ЖИ-инференс сервері.
Амина сондай-ақ Mangitas негізінде құрылған ЖИ шешімдер экожүйесін таныстырды, соның ішінде:
Mangisoz — қазақ, орыс, ағылшын, түрік және қытай тілдерінде сөйлеуді тану мен аударуға арналған қуатты кешен.
Oylan — мәтін, сурет және аудионы талдауға арналған Қазақстандағы алғашқы көптілді мультимодалды ЖИ моделі.
TilSync — көптілді іс-шараларға арналған нақты уақыттағы субтитр және аударма қызметі.
Beynele — қазақ мәдениеті мен болмысын терең түсінетін ЖИ сурет генераторы.
KazHackStan 2025 алаңында ISSAI технологияларын таныстыра отырып, Амина Байкенова Институттың ұлттық қажеттіліктер мен жаһандық стандарттарға бірдей жауап беретін егемен, қауіпсіз және инновациялық ЖИ шешімдерін әзірлеу миссиясын атап өтті. ISSAI-дің белсенді қатысуы оның Қазақстандағы ЖИ инновацияларының стратегиялық қозғаушы күші ретіндегі рөлін тағы да айқындап, академиялық жетістікті, технологиялық дамуды және киберқауіпсіздік пен цифрлық трансформация саласындағы нақты қолдануды өзара байланыстыратынын көрсетті.