Ақылды жүйелер мен жасанды интеллект институты (ISSAI) Қазақстан Республикасы Парламенті Сенатының делегациясын жұмыс сапарымен қабылдап, жасанды интеллект және цифрлық трансформация салаларындағы ынтымақтастық мүмкіндіктерін талқылады. Делегация құрамына Сенат Аппараты басшысының орынбасары Олжас Данабеков, ақпараттық-талдамалық сектордың жетекшісі Гульназ Ахметова, ұйымдастырушылық-бақылау жұмысы секторының жетекшісі Даулет Омаров, сондай-ақ персоналды басқару және ақпараттық қауіпсіздік департаментінің бас кеңесшісі Канат Кабланов кірді.

ISSAI тарапынан кездесуге бас директор доктор Атакан Варол, өнімдер және сыртқы байланыстар жөніндегі директордың міндетін атқарушы Амина Байкенова, сыртқы байланыстар жөніндегі аға менеджер Айгерім Сарсенова және дата-сайентист Рахат Мейрамов қатысты. Сапар аясында Амина Байкенова ISSAI-дың жасанды интеллект саласындағы соңғы әзірлемелері мен тілдерді өңдеу, компьютерлік көру, аудио және мультимодальды деректерге арналған озық модельдер желісі туралы презентация жасап, олардың ұлттық және салалық цифрлық инновацияларды қолдаудағы рөлін таныстырды.

Сенат өкілдері Қазақстанда цифрландыруды ілгерілету мақсатында жетекші ғылыми-зерттеу институттарымен ынтымақтастықты кеңейтуге үлкен қызығушылық танытты. Олар мемлекеттік институттардың жұмыс процестеріне жасанды интеллектті енгізудің маңыздылығы артып келе жатқанын атап өтіп, бұл соңғы үкіметтік директиваларда белгіленген ұлттық басымдықтарға сәйкес келетінін жеткізді.

Кездесу нақты ынтымақтастық бағыттарын одан әрі талқылауды жалғастыру туралы өзара келісіммен аяқталды. Сенат делегациясы ISSAI-дың ғылыми және инженерлік әлеуетін жоғары бағаласа, институт мемлекеттік органдарға жасанды интеллект негізіндегі озық шешімдерді енгізуде қолдау көрсетуге дайын екенін растады. Тараптар мемлекеттік институттар мен ғылыми қауымдастық арасындағы тұрақты ынтымақтастық инновацияларды дамыту және Қазақстанның жаһандық жасанды интеллект кеңістігіндегі позициясын нығайту үшін маңызды екенін атап өтті.