2025 жылғы 6 наурызда ISSAI өкілдері, сыртқы байланыстар жөніндегі аға менеджер Айгерім Сарсенова және HR жөніндегі бас менеджер Дана Маханова, «Қазіргі заманғы әйелдің 3D-табыс формуласы» атты Орталық Азия әйелдер форумына қатысты. Іс-шара бизнес, технология және инновация саласындағы жетекші әйелдерді Орталық Азиядағы әйелдердің өмір сүру сапасын жақсартуға бағытталған негізгі мәселелер мен мүмкіндіктерді талқылау үшін біріктірді.
Форумның негізгі тақырыптары:
Еңбек нарығына ЖИ-дің әсері – сарапшылар жасанды интеллекттің мамандарға қойылатын талаптарды қалай өзгертетінін және мансаптық өсімге қалай ықпал ететінін талқылады.
Қаржылық сауаттылық және жеке бренд – қатысушылар қаржыны басқару, жеке брендті қалыптастыру және цифрлық трансформация жағдайында мансаптық даму бойынша тәжірибелік ұсынымдар алды.
Нетворкинг және тәжірибе алмасу – интерактивті шеберлік сыныптары мен пікірталастар жаңа кәсіби байланыстар орнатуға мүмкіндік берді.
Форумға Қазақстан, Өзбекстан, Қырғызстан және Тәжікстаннан 500-ден астам онлайн-қатысушы, оның ішінде кәсіпкер әйелдер, сондай-ақ IT, маркетинг, қаржы және медицина салаларының мамандары қатысты. Іс-шараның басты мақсаты – кәсіби қауымдастықты дамыту, тәжірибе алмасуға және ынтымақтастық орнатуға жағдай жасау.
Форумды Қазақстан Республикасы Президенті жанындағы Әйелдер істері және отбасылық-демографиялық саясат жөніндегі ұлттық комиссия мен “TechnoWomen” коммерциялық емес ұйымы ұйымдастырды. 2024 жылы бұл ұйымдар “She Innovator”, “IT-Aiel 2.0”, “TechGirls”, “Robotechnogirls” және “Cyber Safe for Women” жобаларын іске асырып, 18 000 қазақстандық әйелге сұранысқа ие цифрлық дағдыларды игеруге және технологиялық салаларда мансабын бастауға мүмкіндік берді.
ЖИ-дің еңбек нарығын дамытудағы рөлі
Дүниежүзілік экономикалық форумның деректері бойынша, 2025 жылға қарай жасанды интеллектке негізделген технологиялар 97 миллион жаңа жұмыс орнын құрып, 75 миллионын алмастырады, бұл 22 миллион жұмыс орнының таза өсіміне әкеледі.
TechnoWomen басшысы Азиза Шужиева атап өтті:
«ЖИ құзыреттерін игеру әйелдерге жаңа кәсіби перспективалар ашады. TechnoWomen сияқты платформалар тек оқытуға ғана емес, сонымен қатар индустриядағы өзгерістерге дайын мамандар қауымдастығын қалыптастыруға көмектеседі».
“Цифрлық экономиканы дамыту орталығы” ЖШС-нің бас директоры Бикеш Құрманғалиева атап өтті:
«Жасанды интеллект әйелдерді кәсіби салалардан ығыстырмайды, бірақ ЖИ-ді меңгергендер оны меңгермегендерді алмастырады. Осы технологияларды меңгеру – кәсіби дамудың маңызды элементіне айналуда».
Форум цифрлық экономиканың өзгерістеріне бейімделу үшін мамандарды даярлаудың өзектілігін және ЖИ құзыреттерін дамытудың маңыздылығын растады.