Астана, 2025 жылғы 2 қазан. Назарбаев Университетінің Ақылды жүйелер және жасанды интеллект институты (ISSAI) мен И. Раззаков атындағы Қырғыз мемлекеттік техникалық университеті (ҚМТУ) жасанды интеллект саласындағы зерттеулер бойынша өзара түсіністік туралы меморандумға (MoU) қол қойды. Құжат Астанада өткен Digital Bridge форумында рәсімделді.
Келісімге ISSAI негізін қалаушы директоры д-р Хүсейін Атақан Варол және ҚМТУ Ақпараттық технологиялар институтының директоры д-р Гульнара Кабаева қол қойды.
Бұл маңызды қадамға 2025 жылғы қыркүйекте өткен онлайн-кездесу негіз болды. Онда ҚМТУ қырғыз тілі үшін сөйлеуді автоматты тану (ASR) және мәтіннен сөйлеу синтезі (TTS) жобалары бойынша бірлесіп жұмыс істеуге мүдделілік білдірді. Меморандум екі мекеме арасындағы ынтымақтастықтың негізін қалап, бірлескен зерттеулер мен әзірлемелерді, сондай-ақ академиялық алмасуларды қамтиды.
Д-р Гульнара Кабаева серіктестіктің маңызын атап өтіп: «ISSAI-дың жасанды интеллект саласындағы терең сараптамасын жоғары бағалаймыз және қырғыз тіліне арналған жоғары сапалы ASR және TTS жүйелерін жасау бойынша ынтымақтасуға қуаныштымыз. Бұл әріптестік қырғыз тілдік технологияларының дамуын қолдайтын инновациялық шешімдерді енгізуге көмектеседі», — деді.
Өңірлік ынтымақтастыққа қатысты ISSAI ұстанымын айқындаған д-р Хүсейін Атақан Варол: «ISSAI мұндай коллаборацияларға әрдайым ашық. Күш-жігер мен ресурстарды біріктіру арқылы өңірдің бай тілдік және мәдени мұрасын бейнелейтін әрі сақтайтын ықпалды ЖИ технологияларын жылдам дамытуға болатынына сенеміз», — деп атап өтті.
Бұл әріптестік ISSAI-дың Орталық Азиядағы өңірлік ынтымақтастықты дамытуға және тілдік-мәдени алуандықты қолдайтын ЖИ технологияларын ілгерілетуге берік бейілділігін көрсетеді. Біріге әрекет ету арқылы ISSAI мен ҚМТУ ЖИ зерттеулеріндегі жергілікті құзыреттілікті күшейтіп, жаһандық инновацияларға үлес қосуды көздейді.
1954 жылы құрылған И. Раззаков атындағы Қырғыз мемлекеттік техникалық университеті — Қырғызстандағы жетекші жоғары оқу орындарының бірі. Университет инженерия, ақпараттық технологиялар және қолданбалы ғылымдар бойынша мықты бағдарламаларымен танымал. ҚМТУ ел мен өңір үшін жоғары білікті мамандар даярлауда маңызды рөл атқарады және ғылыми-зерттеу мен академиялық мүмкіндіктерді кеңейту үшін халықаралық әріптестікті белсенді дамытып келеді.