Қытай, Ханчжоу — 2025 жылғы 25 қазан. Назарбаев Университетінің Ақылды жүйелер мен жасанды интеллект институтының (ISSAI) PhD докторанты әрі зерттеушісі Гурав Могер 2025 жылғы 19–25 қазан аралығында Қытайдың Ханчжоу қаласында өткен беделді IEEE/RSJ International Conference on Intelligent Robots and Systems (IROS 2025) халықаралық конференциясында мобильді роботтардың озық қозғалыс технологияларына арналған соңғы зерттеу жұмысын ұсынды.
Оның «Improbability Roller-2: диаметрі өзгеретін доңғалақтары бар гибридті мобильді робот» атты ғылыми мақаласы ISSAI институтының негізін қалаушы және директоры, Профессор Хусейн Атакан Варолдың жетекшілігімен әзірленген. Зерттеуде Improbability Roller-2 — күрделі және құрылымсыз ортада (мысалы, қар, қиыршық тас, кедір-бұдырлы жер және тар ішкі кеңістіктер) қозғалу қиындықтарын еңсеруге арналған жер бедеріне бейімделгіш мобильді роботтың жетілдірілген нұсқасы ұсынылған.
Improbability Roller-2 моделі нақты уақыт режимінде доңғалақ диаметрін динамикалық түрде өзгертуге мүмкіндік беретін буынды-қатпарлы құрылымға негізделген айнымалы диаметрлі доңғалақ механизмін қолданады. Жүйеде дифференциалды жетекті және доңғалақ өлшемдерінің айырмашылығын басқаруды біріктіретін қос басқару стратегиясы іске асырылған. Бұл тәсіл роботтың маневрлік қабілетін және түрлі жер бедеріне бейімделуін айтарлықтай арттырады.
Эксперименттік сынақтар роботтың еңіс беттерден, борпылдақ топырақтан және тар кеңістіктерден сәтті өтіп, жер бедеріне бейімделу қабілетінің жақсарғанын және механикалық құрылымының жеңілдетілгенін көрсетті. Үлкенірек диаметр өзгерту коэффициенті мен тиімдірек құрылымының арқасында Improbability Roller-2 белгісіз және күрделі ортада жұмыс істейтін мобильді робототехника саласындағы маңызды қадам болып табылады.
📄 Толық мақаланы оқуға болады: techrxiv.org/doi/full/10.36227/techrxiv.175259035.54719703/v2
🎥 Бейне демонстрацияны қараңыз: youtube.com/watch?v=qzT-wChHw04