Назарбаев Университетінің Ақылды жүйелер және жасанды интеллект институтының (ISSAI) Атқарушы директоры Ербол Абсалямов 23 шілдеде Astana Hub-та өткен Data Economy конференциясына қатысты.
Конференцияға мемлекеттік органдардың, бизнестің, халықаралық ұйымдардың, IT-компаниялардың және ғылыми қоғамдастықтың өкілдері жиналып, Қазақстанның Цифрлық кодексін іске асыру және ұлттық деректер нарығын дамыту мәселелерін талқылады.
«Деректер – ұлттық экономиканың активі» атты панельдік пікірталас барысында Ербол Абсалямов деректерді қауіпсіз әрі тиімді алмасу үшін сенімді экожүйе қалыптастырудың маңыздылығын атап өтті.
«Бүгінде мәселе деректердің тапшылығында емес, оларды қауіпсіз әрі тиімді алмасудың қалыптасқан жүйесінің болмауында. Нақты ережелерді, сенімді инфрақұрылымды және нарық қатысушылары үшін ынталандыру тетіктерін құру деректер нарығын дамытудың негізіне айналады».
Ол деректер экономикасы елеулі әсер ете алатын бірқатар саланы атап өтті. Олардың қатарында мемлекеттік басқару, денсаулық сақтау, өнеркәсіп және энергетика, ауыл шаруашылығы, көлік және логистика, сондай-ақ қаржы секторы бар.
Ербол Абсалямов ұлттық деректер экожүйесін дамытудағы университеттер мен ғылыми-зерттеу ұйымдарының рөлін де атап өтті. Олар деректерді ғылыми зерттеулерде пайдаланумен қатар, сапалы деректер жиынтықтарын құру, стандарттар мен бенчмарктерді әзірлеу, мамандар даярлау, сондай-ақ деректер мен жасанды интеллект жүйелері бойынша тәуелсіз сараптама ұсыну арқылы ұлттық экожүйенің дамуына үлес қоса алады.
«Университеттер мен ғылыми-зерттеу ұйымдары деректерді тек тұтынушылар ғана емес, сонымен қатар оларды жасаушылар және мүмкіндігінше деректер нарығын дамытудың негізгі қозғаушы күштерінің бірі болуы тиіс», — деді ол.
ISSAI-дың үлесіне тоқталған Ербол Абсалямов Институттың адамға бағдарланған жасанды интеллект, жоғары сапалы ғылыми зерттеулер, ашық деректер жиынтықтары мен модельдері, сондай-ақ AI-бенчмарктер бағыттарындағы жұмысына назар аударды. Бұл бастамалар Қазақстанның тілдік және әлеуметтік контекстіне бейімделген жасанды интеллект жүйелерін әзірлеуге және олардың тиімділігін бағалауға мүмкіндік береді.
Пікірталас барысында зерттеу прототиптерінен практикалық шешімдерге көшу мәселесіне де ерекше назар аударылды. Бұл бағытта пилоттық жобаларды іске асыру, технологиялар трансфері, коммерцияландыру және ғылым, мемлекет пен бизнес арасындағы ынтымақтастықты нығайту маңызды рөл атқарады.
Конференция барысында Қазақстанда дамып келе жатқан Astana Data Exchange, MedEx және Kompra сияқты цифрлық деректер платформалары да таныстырылды. Бұл бастамалар реттелетін ұлттық деректер нарығын қалыптастыру жолындағы тағы бір маңызды қадам болды.
Data Economy конференциясын Қазақстан Республикасының Стратегиялық жоспарлау және реформалар агенттігі ұйымдастырды.