2026 жылғы 16 қазанда Назарбаев Университетінің Ақылды жүйелер және жасанды интеллект институты (ISSAI) Meta компаниясының өкілдерімен жасанды интеллектті дамыту және ықтимал ынтымақтастық бағыттарын талқылауға арналған кездесу өткізді.
ISSAI атынан Назарбаев Университетінің ассистент-профессоры әрі Автономды робототехника және мехатроника жүйелері (ARMS) зертханасының жетекшісі доктор Азамат Ешмұхаметов, әкімшілік директор Гибрат Құрманов, деректер жөніндегі аға ғылыми маман Ақылбек Махутов және сыртқы байланыстар жөніндегі менеджер Ұлжан Әлібек қатысты.
Meta делегациясының құрамында Орталық Азия, Моңғолия, Шри-Ланка және Мальдив аралдары бойынша мемлекеттік саясат жөніндегі бөлімнің жетекшісі Сенура Абейвардена және Оңтүстік және Орталық Азия бойынша мемлекеттік саясат жөніндегі директоры Юэн Тинг Чай болды. Олармен бірге Aretera PA компаниясының Орталық Азия және Оңтүстік Кавказ бойынша серіктесі әрі басқарушы директоры Павел Мельников және Aretera PA кеңесшісі Мейрамбек Тыныш қатысты.
Кездесу барысында ISSAI өкілдері Институттың ғылыми-зерттеу қызметі мен жасанды интеллект саласындағы жүзеге асырылып жатқан жобаларын таныстырды. Өз кезегінде Meta өкілдері компанияның AI саласындағы соңғы әзірлемелерімен бөлісті. Олардың қатарында пайдаланушыларға тапсырмаларды орындауға және жұмыс үдерістерін үйлестіруге көмектесуге арналған, жасанды интеллект негізіндегі жеке көмекші — Muse бар. Қатысушылар үлкен тілдік модельдер (LLM), Қазақстанда AI технологияларын дамыту және осы саладағы жаңа үрдістер туралы пікір алмасты. Сондай-ақ ISSAI мен Meta арасындағы AI зерттеулері мен технологияларын әзірлеу бағытындағы ықтимал ынтымақтастық мүмкіндіктерін талқылады.
Кездесуден кейін доктор Азамат Ешмұхаметов қонақтарға ARMS зертханасын таныстырып, жүзеге асырылып жатқан робототехникалық жобалар мен зертхананың ғылыми-зерттеу жұмыстарын көрсетті.
Сапар ISSAI мен Meta арасындағы диалогты нығайтуға және жасанды интеллект пен робототехника салаларындағы болашақ ынтымақтастықтың ықтимал бағыттарын қарастыруға мүмкіндік берді.