4-ші мамырда Қазақстан Республикасының Президенті Қасым-Жомарт Тоқаев білім беру және ғылыми-зерттеу қызметімен, сондай-ақ жоғары оқу орнының одан әрі даму стратегиясымен танысу мақсатында Назарбаев Университетіне барды.
Сапар барысында НУ президенті Шигео Катсу Мемлекет басшысын қарсы алып, Назарбаев Университетінің кампусын, зерттеу орталықтары мен зертханаларын дамыту жоспарымен таныстырды.
Мемлекет басшысына ғылым, жасанды интеллект, білім беру, денсаулық сақтау, саяси жүйені жаңғырту, цифрландыру, ауыл шаруашылығы, экология және спорт салаларындағы жобалар таныстырылды.
Атап айтқанда, Мемлекет басшысы Ақылды жүйелер мен жасанды интеллект институтының (ISSAI) жобаларымен танысты. ISSAI негізін қалаушы директоры, проф. Хусейн Атакан Варол ISSAI-дың зерттеу жұмысы туралы презентация өткізді. Профессор Варол Институттың жобалары туралы, оның ішінде қазақ тіліне арналған жасанды интеллект негізіндегі тіл мен табиғи тілді өңдеу технологиялары, ҚР Қаржы Министрлігі үшін жасанды интеллект шешімдері және денсаулық сақтау саласындағы жетістіктер туралы айтып берді, сондай-ақ Қазақстандағы студенттерге арналған білім беру бастамалары туралы айтып берді. Осыдан кейін ISSAI техникалық жоба координаторы Ербол Абсалямов ISSAI командасы әзірлеген қазақ сөзін автоматты түрде тану және қазақ мәтінін сөйлеуге түрлендіру технологияларды көрсетті.
Сонымен қатар, зерттеушілер доктор Жанат Қаппасов, Тоғжан Сырымова және доктор Азамат Ешмұхаметов Президентті өздерінің ғылыми жобаларымен таныстырды. Атап айтқанда, доктор Қаппасов пен Сырымова ханым “Кеудедегі ісіктерді анықтауға арналған тактильді қолғап” жобасын көрсетті, ал доктор Ешмұхаметов Президентке “Тенсегрити роботы: роботтарды жобалаудың жаңа парадигмасы” жобасын көрсетті.
Оқу орнын аралап көрген Қасым-Жомарт Тоқаев студенттермен әңгімелесіп, университеттің құрметті қонақтар кітабына қолтаңбасын қалдырды. Президент НУ Қазақстандағы жоғары білім беруді жаңғыртуға жүйелі ықпал жасап отырғанын атап өтті.