2025 жылғы 28 мамырда Ақылды жүйелер және жасанды интеллект институты (ISSAI) Meta Platforms Inc. компаниясының қоғамдық саясат жөніндегі директоры Сарим Азизді жылы қабылдап, жемісті кездесу өткізді. Бұл сапар жасанды интеллект саласындағы ғылыми зерттеулер мен ықтимал серіктестік мүмкіндіктеріне арналды. Онымен бірге Aretera Public Affairs компаниясының өкілдері – Орталық Азия және Оңтүстік Кавказ бойынша серіктес әрі атқарушы директор Павел Мельников, сондай-ақ кеңесшілер Мейрамбек Тыныш пен Ерлан Каримов қатысты.
ISSAI тарапынан кездесуге Бас директор Доктор Атакан Варол, атқарушы директор Ербол Абслямов, мемлекеттік органдармен байланыс жөніндегі менеджер Алайдаp Амирсеит, IT өнімдер менеджері Амина Байкенова және сыртқы байланыстар бойынша аға менеджер Айгерім Сарсенова қатысты. Кездесу барысында Алайдаp Амирсеит ISSAI-дың миссиясы мен негізгі бастамалары туралы шолу ұсынды.
Талқылау мазмұнды әрі шабыттандырарлық болды — Орталық Азиядағы ЖИ-дің өсіп келе жатқан рөлі мен халықаралық ынтымақтастықтың маңыздылығы ерекше аталды. Сарим Азиз ISSAI-дың KazLLM, MangiSoz және Oylan2 сияқты флагмандық жобаларына ерекше қызығушылық танытып, Қазақстанда атқарылып жатқан жұмыстың ауқымы мен әсеріне жоғары баға берді. Ол сондай-ақ Facebook AI Research (FAIR) зерттеу зертханаларын ЖИ саласындағы жоғары деңгейлі зерттеулермен айналысатын PhD студенттері үшін құнды мүмкіндік ретінде атап өтіп, жаһандық серіктестіктерді одан әрі дамытуға шақырды.
Кездесу нәтижесінде ISSAI мен халықаралық технологиялық қауымдастық арасындағы ынтымақтастықты нығайтуға және аймақтық ЖИ-инновациялар көшбасшыларымен байланысты кеңейтуге ортақ ниет білдірілді. ISSAI Орталық Азиядағы жасанды интеллектті дамытуда алдыңғы шепте тұрғанын мақтан тұтады және ғылым мен технологияны ілгерілету жолында стратегиялық серіктестік арқылы жұмысын жалғастыруға ниетті.