2025 жылдың 1 қазанында Назарбаев Университетінің Ақылды жүйелер және жасанды интеллект институты (ISSAI) AI Horizons: A Conversation with Global Leaders атты маңызды іс-шара өткізді. Бұл кездесу жасанды интеллект саласының әлемдік деңгейдегі көшбасшыларын біріктірген айтулы оқиға болды.

Пікірталасқа Питер Норвиг — Стэнфорд университетінің зерттеушісі және Google компаниясының зерттеу жөніндегі директоры; Джон Хопкрофт — Тьюринг сыйлығының лауреаты және есептеу теориясының көрнекті ғалымы; сондай-ақ Меруан Деббах — Сауд Арабиясындағы Халифа ғылым және технология университетінің профессоры қатысты. Сессияны ISSAI институтының негізін қалаушы және директоры, профессор Хюсеин Атақан Варол жүргізді. Кездесуге Назарбаев Университетінің студенттері, оқытушылары және жасанды интеллект саласындағы зерттеушілер қауымдастығы қатысты.

Бұл ғалымдардың Қазақстанға сапары еліміздің Президенті бастамасымен құрылған Ұлттық жасанды интеллект кеңесі аясындағы бастамалардың бірі ретінде өтті. Кеңестің мақсаты — Қазақстанды жаһандық жасанды интеллект дамуының алдыңғы қатарлы орталықтарының біріне айналдыру. Іс-шара Қазақстан Республикасының Жасанды интеллект және цифрлық даму министрлігінің қолдауымен ұйымдастырылды. Министрлік халықаралық сарапшылардың Қазақстанға келуін және елдің өсіп келе жатқан ЖИ қауымдастығымен өзара іс-қимылын қамтамасыз етуде маңызды рөл атқарды.

Кездесу барысында қатысушылар жасанды интеллект зерттеулерінің болашағы, білім беру және жаһандық бәсекеге қабілеттілік тақырыптарын талқылады.

Профессор Хопкрофт терең оқыту дәуірінде де классикалық информатиканың маңызын атап өтіп, жастарға мансапты жеке қызығушылыққа сай құрудың қажеттілігін еске салды: «Өмір бір-ақ рет беріледі. Оны бос өткізбеу керек. Өзіңізге не ұнайтынын анықтап, мансабыңызды сол бағытта құрыңыз — сонда жұмыс емес, сүйікті ісіңізбен айналысасыз».

Профессор Норвиг барған сайын күрделеніп келе жатқан ЖИ жүйелерінің түсіндіру мәселелеріне тоқталып, сенімділіктің маңызын атап өтті: «Түсіндіру — бұл бір әңгіме, ал адамдар әңгімелерді жақсы көреді. Бірақ кейде сол әңгімелер бізді адастыруы мүмкін. Шынайы сенімділікке қол жеткізу үшін көптеген тәсілдер, тексерулер мен тепе-теңдіктер қажет — сонда ғана біз “иә, бұл жүйе өз міндетін дұрыс атқарып жатыр” деп айта аламыз».

Панелистер сонымен қатар Қазақстанның жаһандық жасанды интеллект экожүйесіндегі рөлі туралы өз көзқарастарымен бөлісті. Профессор Хопкрофт еліміз үшін жақын уақыттағы мүмкіндіктер ауыл шаруашылығы мен білім беру саласында екенін атап өтті. Профессор Норвиг жас ғалымдарға нақты өмірлік мәселелерге назар аударуға кеңес берді: «Адамдарға шын мәнінде қажет нәрсені жасаңыз».

Ал профессор Деббах студенттерді белсенді болып, әлемдік ғалымдармен байланыс орнатуға шақырды: «Сізді шабыттандыратын ғалымдарға хат жазыңыз. Олардың еңбектерін зерттегеніңізді көрсетіңіз, мәселені анықтап, өз үлесіңізді қалай қоса алатыныңызды ұсыныңыз».

Іс-шара соңында Назарбаев Университетінің студенттері мен ғалымдар ашық пікір алмасты. Бұл кездесу жасанды интеллект саласында жаңа буын зерттеушілері мен мамандарын шабыттандырып, олардың қызығушылығы мен шығармашылық әлеуетін арттырды.