2026 жылғы 3 қыркүйекте Назарбаев Университетінің Ақылды жүйелер және жасанды интеллект институты (ISSAI) жасанды интеллект және ақпараттық технологиялар саласындағы жетекші қытайлық компаниялардың бірі iFLYTEK өкілдерін қабылдады. Компания сөйлеу және тіл технологиялары, жасанды интеллект және интеллектуалды есептеу бағыттарына маманданған. Кездесу барысында екі ұйым арасындағы ынтымақтастықтың әлеуетті бағыттары талқыланды.
Кездесуде ISSAI атынан ISSAI бас директоры, доктор Атакан Варол, деректерді талдау жөніндегі маман Мамырбек Парахат және сыртқы байланыстар жөніндегі менеджер Ұлжан Әлібек қатысты.
iFLYTEK делегациясының құрамында Орталық Азия бойынша өңірлік бас менеджер Мартин Ма, Қазақстан бойынша бизнес-менеджер Мусырет Асет, Қазақстан бойынша пресейл-менеджер Бақыт Ернар және өнімдер жөніндегі сарапшы Иван Су болды.
Кездесу ISSAI өкілі Мамырбек Парахаттың 2026 жылғы 1–2 шілдеде Өзбекстанның Ташкент қаласында өткен iFLYTEK Open Platform Central Asia Launch Event іс-шарасына қатысуының жалғасы болды.
Кездесу барысында екі тарап өз қызметі, зерттеулері, технологиялары және жүзеге асырылып жатқан жобалары туралы таныстырылымдар жасады. iFLYTEK өкілдері сондай-ақ компанияның Таяу Шығыс және Орталық Азия елдеріндегі қызметі мен шешімдеріне шолу жасап, өңірде жасанды интеллект негізіндегі технологияларды әзірлеу және енгізу тәжірибесімен бөлісті.
Кездесу тараптарға тәжірибе алмасып, жасанды интеллект саласындағы қазіргі даму үрдістерін, атап айтқанда көптілді технологиялар мен Орталық Азия үшін өзекті жасанды интеллект шешімдерін қолдану бағыттарын талқылауға мүмкіндік берді.
Таныстырылымдар мен пікірталас қорытындысы бойынша тараптар одан әрі ынтымақтастықтың бірнеше әлеуетті бағытын айқындап, бірлескен зерттеулер, технологияларды әзірлеу және жасанды интеллект шешімдерін енгізу бойынша диалогты жалғастыруға қызығушылық білдірді. Сондай-ақ тараптар болашақта бірлескен жобаларды жүзеге асыру мүмкіндіктерін қарастырып, өзара байланысты жалғастыруға келісті.