Назарбаев Университетінің Ақылды жүйелер және жасанды интеллект институтының (ISSAI) постдокторант-зерттеушісі доктор Гурав Могер АҚШ-тың Питтсбург қаласында өткен 2026 IEEE/RSJ International Conference on Intelligent Robots and Systems (IROS) конференциясында «A Honeycomb-Inspired Soft Robotic Gripper with Intrinsic Adaptive Control» атты ғылыми зерттеу жұмысын таныстырды.
Зерттеу жұмысының авторларының қатарында Есептеу техникасы және жасанды интеллект мектебінің (SCAI) профессоры Жанат Қаппасов бар. Зерттеуге жетекшілік еткен — ISSAI негізін қалаушы директоры, SCAI профессоры Хусейн Атакан Варол.
Мақалада бір айналмалы жетек арқылы жұмыс істейтін, электр қуатымен басқарылатын төрт саусақты жұмсақ роботтық ұстағыш ұсынылған. Құрылғының бейімделгіш ұстау диаметрі 15–125 мм аралығын қамтиды. Сызықтық емес басқару динамикасы сияқты дәстүрлі пневматикалық жүйелерге тән шектеулерді еңсеру үшін конструкцияда 3D-принтер арқылы жасалған термопластикалық полиуретаннан (TPU) жасалған ұяшықты құрылымдағы ұштықтар қолданылған. Бұл икемді құрылымдар әртүрлі нысандардың пішініне, беткі текстурасына және қаттылық деңгейіне пассивті түрде бейімделе отырып деформацияланады.
Пассивті механикалық бейімделумен қатар, жүйеде қозғалтқыш тогының кері байланысына негізделген ішкі басқару стратегиясы қолданылады. Бұрышқа тәуелді базалық ток мәндерінің орнын толтыру арқылы ұстағыш нысанмен жанасу сәтін анықтап, сыртқы тактильді немесе күш датчиктерін қолданбай-ақ жабылу процесін қауіпсіз түрде тоқтата алады.
Конференциядан кейін доктор Могер Carnegie Mellon University (CMU) және New York University (NYU) университеттеріндегі жетекші робототехника зертханаларына барды. Бұл сапарлар зерттеушілермен байланыс орнатуға, манипуляциялау және жұмсақ робототехника салаларындағы озық әзірлемелер бойынша тәжірибе алмасуға, сондай-ақ болашақтағы ғылыми ынтымақтастықтың ықтимал бағыттарын талқылауға мүмкіндік берді.
Ұстағыштың мүмкіндіктерін көрсететін бейнероликті мына сілтемеден көруге болады: https://www.youtube.com/watch?v=SJ84-XktrXM