2026 жылғы 30 қыркүйекте Назарбаев Университетінің Ақылды жүйелер және жасанды интеллект институты (ISSAI) Қазақстан Республикасы Президентінің Жасанды интеллект жөніндегі кеңесінің мүшесі, AI-SANA атқарушы директоры, профессор Пол Кимнің қатысуымен қонақ дәрісін өткізді. Профессор Ким бұған дейін Стэнфорд университетінің Жоғары білім беру мектебінде деканның орынбасары және технологиялар жөніндегі бас директор қызметтерін атқарып, жасанды интеллект, білім беру және технологиялар тоғысындағы бағыттарда жұмыс істеген.
«Жасанды интеллект және білім берудің болашағы» тақырыбындағы дәріс барысында жасанды интеллекттің білім беру жүйесіне, еңбек нарығына және кәсіпкерлікке тигізіп жатқан әсері талқыланды. Профессор Ким агенттік жасанды интеллект туралы айтып, білім беру жүйесінің білім алушыларды жасанды интеллектке негізделген экономика жағдайында жұмыс істеуге қалай дайындай алатынына тоқталды. Ол жасанды интеллект жүйелерімен тиімді жұмыс істеу үшін қажетті дағдыларды дамытуға және жаңа мүмкіндіктер қалыптастыруға ерекше назар аударды.
Дәріс аясында профессор Ким AI-SANA платформасын Қазақстандағы жасанды интеллект саласындағы кәсіпкерлік экожүйені дамыту құралы ретінде таныстырды. Ол жасанды интеллект бойынша білім берумен ғана шектелмей, практикалық жобаларды іске асыруға, кәсіпкерлік дағдыларды дамытуға және ауқымды инновациялық экожүйелер құруға көшудің маңыздылығын атап өтті.
Сонымен қатар дәріс барысында білім алушылардың жаңа шешімдер әзірлеушілеріне және жасанды интеллектке негізделген қалыптасып келе жатқан экономикадағы кәсіпкерлерге айналуына бағытталған білім беру жобалары мен тәсілдері таныстырылды.
Іс-шараға Назарбаев Университетінің студенттері, оқытушылары мен зерттеушілері, сондай-ақ ISSAI және Назарбаев Университетінің Есептеу техникасы және жасанды интеллект мектебінің (SCAI) өкілдері қатысты.
Дәріс Назарбаев Университеті қауымдастығы үшін жасанды интеллект дәуіріндегі білім берудің өзгеріп отырған рөлін, сондай-ақ болашаққа дайын мамандарды қалыптастыру үшін қажетті дағдыларды, кәсіпкерлікті және инновациялық экожүйелерді талқылауға мүмкіндік берді.