ISSAI ғылыми қызметкері, Назарбаев Университетінің Инженерия және цифрлық ғылымдар мектебінің PhD докторанты Жанат Махатаева 23-28 сәуір аралығында Германияның Гамбург қаласында өткен ACM CHI 2023 конференциясына қатысты. Конференцияға дейін 2022 жылдың тамыз бен қараша аралығында Жанат Ұлыбританияның Microsoft Research Cambridge компаниясында 12 апталық ғылыми тағылымдамасын аяқтап, дарынды инженерлер, дизайнерлер, зерттеушілер және ғалымдар тобымен жұмыс істеді. Жанат Қазақстаннан бұл стипендияға ие болған алғашқы студент болды.
Microsoft Research Cambridge, Ұлыбританияда жұмыс істеген уақытында ол зағип пайдаланушылар мен нашар көретін адамдарға арналған «Scene Weaver» виртуалды шындық прототипін әзірлеуге үлес қосты. CHI 2023 конференциясының интерактивті сессиясында Жанат және оның Microsoft командасы «Scene Weaver» жұмысының демонстрациясын көрсетті.
Есептеу жүйелеріндегі адам факторлары туралы ACM CHI конференциясы адам мен компьютердің өзара әрекеттесуі (HCI) бойынша жетекші халықаралық конференция болып есептеледі. Конференция жыл сайын әлемнің әртүрлі мәдени орталардан келген зерттеушілер мен практиктерді біріктіреді, олардың мақсаты әлемді интерактивті цифрлық технологиялар арқылы жақсарту мен дамыту.